بڑھتی ہوئ آبادی صحرازدگی، روائتی چولوں سے پھیلنے والی آلودگی کو جانچنے اور بارانی جنگل کٹنے تک --- تازہ ترین عالمی حقائق

انتخاب: ناصر پنہور       ترجمہ: ذيشان حيدر

خلائی تحقیق کے امریکی ادارے 'ناسا' نے انکشاف کیا ہے کہ کرئہ ارض پر صحرا زدگی کا عمل تیز ہوگیا ہے اور زمین تیزی سے ریگستان میں تبدیل ہوتی جارہی ہے۔ سائنسدانوں نے فضائی جائزوں کے تجزیے کے بعد یہ انکشاف کیا ہے۔ سائنسدانوں کے لیے یہ بات ایک بڑے چیلنج کی حیثیت رکھتی ہے کہ وہ سائنسی بنیادوں پر یہ معلوم کریں کہ صحرؤں کے پھیلاؤ سے ماحول میں کیا کیا تبدیلیاں رونما ہوتی ہیں۔ یہ تجزیہ صحراؤں کے پھیلاؤ کے پس پردہ عوامل کو سمجھنے میں ماہرینِ ماحول کے لیے مددگار ثابت ہوگا۔

زمین کا ایک بڑا استعمال چراگاہوں کی صورت میں ہوتا ہے۔ دنیا بھر میں خشک، نیم بنجر اور نیم مرطوب علاقوں میں چراگاہیں پائی جاتی ہیں، لیکن ان میں سے بعض علاقے اتنی تیز ی سے صحرا میں تبدیل ہورہے ہیں کہ اقوامِ متحدہ کو یہ مسئلہ اپنے ماحولیاتی ایجنڈے میں سرِ فہرست لانا پڑا ہے۔

سائنسدانوں نے تحقیق کے دوران اس بات کا بھی پتہ چلایا ہے کہ جب کوئی علاقہ صحرا زدگی کا شکار ہوتا ہے تو وہاں پائی جانے والی نباتات میں بھی تبدیلیاں رونما ہونے لگتی ہیں ۔صحرائی علاقوں کا پھیلاؤ کرئہ ارض کو درپیش سنگین ماحولیاتی مسائل میں سے ایک ہے۔ صحرا زدگی کا مسئلہ بھی آب و ہوا، نباتات اور انسانی سرگرمیوں کے درمیان قائم پیچیدہ تعلق پر مشتمل ہے۔ اس تعلق کے مختلف پہلوؤں کا تفصیلی جائزہ اور صحرا زدگی کو روکنے کےلئے دنیا بھر میں سائنسدان مشاہدے اور تحقیق میں مصروف ہیں۔

''امیزون کے بارانی جنگل تیزی سے گھٹتے جارہے ہیں جو کہ ماحول کے حوالے سے نہایت تشویشناک بات ہے۔ ان جنگلات کے رقبے میں ہونے والی کمی پہلے لگائے گئے تخمینوں سے دو گنا زائد ہوچکی ہے۔'' یہ بات حال ہی میں 'سائنس جرنل' میں شائع ہونے والی ایک تحقیق میں کہی گئی ہے۔

سائنسدانوں کے مطابق ان بارانی جنگلات کے رقبے میں کمی سے فضا میں کاربن ڈائی آکسائیڈ کی مقدار بڑھے گی اور جنگل میں لگنے والی آگ کی شرح بھی بڑھ جائے گی۔ برازیل کے علاقے میں واقع امیزون جنگل کی خلائی سیارے کی مدد سے لی گئی تصاویر اور جائزوں سے پتا چلا ہے کہ یہاں سالانہ تقریباً ساڑھے پندرہ سو مربع کلومیٹر پر واقع درختوںکاٹ ڈالا جاتا ہے، یوں دنیا کے گھنے ترین بارانی جنگل کا مستقبل خطرے سے دوچار ہے۔

ناصر علی پنہور آئی یو سی این، سندھ پروگرام آفس سے بطورِ کوآرڈینیٹر وابستہ ہیں۔
ذیشان حیدر شعبئہ طب سے وابستہ ہیں۔ صحت و ماحول کے حوالے سے مختلف رسائل میں اکثر مضامین لکھتے ہیں۔